2-ci “Karyera sərgisi” keçiriləcək

“ASAN Könüllülük” Məktəbinin “ASAN kadr” karyera mərkəzi, Bakı Ali Neft Məktəbi və “Coca-Cola” şirkətinin birgə əməkdaşlığı ilə 2-ci “Karyera sərgisi” keçiriləcək. Gənclərin məşğulluğunun artırılmasına yönəlmiş karyera sərgisi bütün vətəndaşlar üçün açıq elan edilir. Sərgidə vətəndaşlara məşğulluq, iş, təcrübə imkanları təklif ediləcək, habelə müxtəlif şirkətlərin insan resursları üzrə mütəxəssisləri ilə peşəkar ünsiyyət qurmağa şərait yaradılacaq. Sərgi 12 mart 2019-cu il tarixində Bakı

Ali Neft Məktəbinin yeni kampusunda saat 10:00-13:00-a kimi davam edəcək. Sərgidə müxtəlif yerli və xarici müəssisələrin nümayəndələri iştirak edəcəklər. Sərginin əsas məqsədi savadlı, bacarıqlı, təcrübəli və iş potensialı ilə fərqlənən gənclərin dövlət və özəl qurumlarda işlə təmin olunmalarına dəstək göstərmək və müəssisələrin mövcud iş vakansiyaları haqqında məlumat vermələri üçün şərait yaratmaqdır. 2018-ci ildə keçirilən 1-ci “Karyera sərgisi”ndə 1500-dən çox iştirakçı və 53 müəssisə təmsil olunub.